Shivaji University Kolhapur: शिवाजी विद्यापीठाचा दीक्षांत सोहळा: ७७,५४२ स्नातकांना पदवी, अन्य प्रमाणपत्रे प्रदान – kolhapur university 57th annual convocation of the shivaji university kolhapur through online mode


म. टा. प्रतिनिधी, कोल्हापूर

नवपदवीधरांनी आपल्या ज्ञानाचा उपयोग समाजातील वंचित, शोषित घटकांच्या उत्थानासाठी करावा, असे आवाहन अखिल भारतीय तंत्र शिक्षण परिषदेचे चेअरमन प्रा. अनिल सहस्रबुद्धे यांनी आज येथे केले. शिवाजी विद्यापीठाच्या ५७व्या दीक्षान्त समारंभाचे प्रमुख पाहुणे म्हणून स्नातकांना संबोधित करताना ते बोलत होते.

कोविड-१९ साथीच्या पार्श्वभूमीवर ऑनलाईन पद्धतीने झालेल्या या समारंभाच्या अध्यक्षस्थानी विद्यापीठाचे कुलपती तथा महाराष्ट्राचे राज्यपाल भगतसिंह कोश्यारी होते, तर राज्याचे उच्च व तंत्र शिक्षण मंत्री उदय सामंत प्रमुख पाहुणे म्हणून उपस्थित होते. या ऑनलाईन कार्यक्रमाचा सुमारे सात हजार नागरिकांनी लाभ घेतला. या कार्यक्रमात ७७,५४२ स्नातकांना पदवी, पदव्युत्तर पदवी, पदविका, प्रमाणपत्रे व पीएच.डी. पदवी प्रदान करण्यात आल्या.

प्रा. सहस्रबुद्धे नवपदवीधरांना मार्गदर्शन करताना म्हणाले, आज आपल्या जीवनातील एक महत्त्वाचा दिवस आणि आयुष्याच्या प्रवासातील महत्त्वपूर्ण टप्पा आहे. तीव्र स्पर्धेला सामोरे जात आपण या गौरवशाली परंपरेच्या विद्यापीठामध्ये प्रवेश घेतला आणि आपले शैक्षणिक कार्य मोठ्या तन्मयतेने साध्य करण्याचा प्रयत्न केला. कठोर परिश्रम आणि उच्च कोटीची समर्पण वृत्ती या जोरावर आपण आपली पदवी आणि पुरस्कार प्राप्त केले आहेत. हा आपणासह आपले आयुष्य घडविण्यात मोलाचा वाटा उचलणारे आपले शिक्षक, पालक अशा सर्वांसाठीच अत्यंत अभिमानाचा क्षण आहे.

डॉ. सहस्रबुद्धे म्हणाले, नवे शैक्षणिक धोरण विद्यार्थ्यांना भारताच्या इतिहास आणि संस्कृतीचा सखोल परिचय करून देईल आणि त्यांना जागतिक नागरिकांमध्ये रूपांतरित करेल. हे धोरण मानवी समस्यांसाठी एकात्मिक सर्वसमावेशक संशोधन समाधानास प्रोत्साहन देईल. त्यासाठी या धोरणाची सुयोग्य अंमलबजावणी करणे महत्त्वाचे आहे.

शिवाजी विद्यापीठाच्या हिवाळी सत्र परीक्षा तिसऱ्यांदा लांबणीवर

शासन विद्यापीठासमवेत: उदय सामंत

महाराष्ट्र शासन विद्यार्थी हिताच्या उपक्रमांसाठी सदैव शिवाजी विद्यापीठासमवेत असल्याचे सांगून राज्याचे उच्च व तंत्र शिक्षण मंत्री उदय सामंत म्हणाले, शिवाजी विद्यापीठाचा माजी विद्यार्थी असल्याचा मला अभिमान आहे. शिवाजी विद्यापीठाने आपल्या कार्यक्षेत्रालगतच्या सीमाभागातील मराठी विद्यार्थ्यांच्या शैक्षणिक उत्थानासाठी प्रयत्न चालविले आहेत. अलिकडेच विद्यापीठातर्फे सीमाभागातील विद्यार्थ्यांसाठी व्यावसायिक अभ्यासक्रम सुरू करण्यासाठी विद्यापीठाने मोठा पुढाकार घेतला, ही अभिनंदनीय बाब आहे. त्याचबरोबर विद्यापीठाच्या राष्ट्रीय सेवा योजनेच्या विद्यार्थ्यांनी कोविड-१९ साथीच्या काळात पोलीस मित्र, आरोग्य मित्र अशा अनेक भूमिकांतून काम केले आणि आपल्या सामाजिक बांधिलकीचे दर्शन घडविले, ही बाब कौतुकास्पद आहे. शिवाजी विद्यापीठाच्या उपक्रमांना महाराष्ट्र शासनाचे सदैव सहकार्य राहील, अशी ग्वाही या प्रसंगी त्यांनी दिली.

चाचणी ४८ तासांसाठीच वैध; दर दोन दिवसाआड चाचणीचा शिक्षकांवर तणाव

ही पदवी पहिली ठरावी; अंतिम नव्हे: कुलपती भगतसिंह कोश्यारी

शिवाजी विद्यापीठाचे ७७,५४२ स्नातक आज पदवी घेऊन बाहेर पडताहेत. मात्र, त्यांच्यासाठी ही पदवी पहिली ठरावी, अंतिम नव्हे! कारण शिक्षण ही निरंतर प्रक्रिया आहे आणि विद्यार्थ्यांनी संधी मिळेल तितके उच्चशिक्षण घ्यावे, असे आवाहन महाराष्ट्राचे राज्यपाल तथा विद्यापीठाचे कुलपती भगतसिंह कोश्यारी यांनी या प्रसंगी केले.

आपल्या अध्यक्षीय मनोगतामध्ये राज्यपाल कोश्यारी म्हणाले, शिक्षणाच्या पुढची पायरी म्हणजे विद्या अगर ज्ञान संपादन ही असते. ‘ज्ञानमेवामृतम्’ हे शिवाजी विद्यापीठाचे ब्रीद आहे. याचा अर्थ ज्ञान मनुष्याला अमर बनविते. ही मोठी बाब आहे. या ज्ञानाचा वापर आपण आपल्या भोवतालाचे कल्याण करण्यासाठी करणे आवश्यक आहे.
दहावी, बारावीच्या परीक्षा ऑफलाइनच; कठोर निर्बंधांच्या पार्श्वभूमीवर परीक्षांसाठी तयारी

नॅक’चे ‘ए++’ मानांकन प्राप्त केल्याबद्दल अभिनंदन

शिवाजी विद्यापीठाने नुकत्याच झालेल्या नॅकच्या पुनर्मूल्यांकनामध्ये ३.५२ सीजीपीए गुणांकनासह ‘ए++’ मानांकन मिळविल्याबद्दल सर्वच मान्यवरांनी त्यांच्या भाषणामध्ये विद्यापीठाबद्दल गौरवोद्गार काढले. विद्यापीठाने शैक्षणिक, संशोधन, प्रशासकीय दर्जा सिद्ध करण्याबरोबरच विद्यार्थीप्रियता, सामाजिक बांधिलकी या निकषांवर देश पातळीवर आपली गुणवत्ता सिद्ध केली आहे, याचा अभिमान असल्याचे कौतुकोद्गार राज्यपाल श्री. कोश्यारी यांच्यासह मंत्री उदय सामंत आणि प्रा. सहस्रबुद्धे यांनी काढले.

मुंबई विद्यापीठ पीजी परीक्षांसाठी पहिल्यांदाच देणार क्वेश्चन बँक

सुमारे सात हजार जणांची लाइव्ह उपस्थिती

यंदा कोविड-१९ साथीच्या पार्श्वभूमीवर, शिवाजी विद्यापीठाने ५७वा दीक्षान्त समारंभ ऑनलाईन पद्धतीने आयोजित करण्याचे ठरविले. त्यानुसार आज हा संपूर्ण कार्यक्रम विद्यापीठाच्या ‘शिव-वार्ता’ या युट्यूब वाहिनीवरुन थेट प्रक्षेपित करण्यात आला. ६९०६ नागरिकांनी हा कार्यक्रम लाइव्ह पाहिला. त्यानंतरही दिवसभरात सवडीनुसार लोक हा कार्यक्रम पाहात असल्याने आकडा वाढताच राहिला.

Author: admin

Leave a Reply

Your email address will not be published. Required fields are marked *