मुंबई विद्यापीठाला सिंधुदुर्गातील जमिनीऐवजी पर्यायी जमीन



म. टा. विशेष प्रतिनिधी, मुंबई

सिंधुदुर्ग जिल्ह्यातील येथील मुंबई विद्यापीठाची जमीन मेडिकल कॉलेजसाठी राज्य सरकारला पुन्हा सुपूर्द करण्यात आली आहे. या जागेऐवजी विद्यापीठाला उपकेंद्रासाठी पर्यायी जागा दिली जाणार असल्याचे उच्च व तंत्र शिक्षण मंत्री उदय सामंत आणि खासदार विनायक राऊत यांनी सांगितल्याचे युवा सेनेचे सदस्य व विद्यापीठ व्यवस्थापन परिषदेचे सदस्य प्रदीप सावंत यांनी स्पष्ट केले.

सिंधुदुर्ग येथे सरकारी सुरू करण्याच्या उद्देशाने सरकारने मुंबई विद्यापीठाला उपकेंद्रासाठी दिलेली जमीन पुन्हा सरकारकडे सुपूर्द करण्याची विनंती केली. यानुसार विद्यापीठाने व्यवस्थापन परिषदेत ठराव संमत करून ही जमीन सरकारला सुपूर्द करण्याचा निर्णय घेतला. मात्र विद्यापीठाला पर्यायी जागा देणार असल्याचे लेखी आश्वासन सरकारकडून घ्यावे, अशी मागणी काही सदस्यांनी केली. याबाबत ‘मटा’ने सोमवारी वृत्त प्रसिद्ध केले. विद्यापीठाने सिंधुदुर्गात उपकेंद्र उभारावे यासाठी खासदार विनायक राऊत आणि मंत्री उदय सामंत यांनी प्रयत्न करून ही जागा मिळवून दिली होती. मात्र सध्याची करोना महामारीची परिस्थिती लक्षात घेता राज्य सरकारने आरोग्यसेवेला प्राधान्य देण्याचे ठरविले आहे. सिंधुदुर्ग येथे सरकारी रुग्णालय नसल्याने येथील नागरिकांना मोठ्या आजारासाठी कोल्हापूर किंवा गोवा येथे उपचारासाठी जावे लागते. हे लक्षात घेता सरकारने हा महत्त्वपूर्ण निर्णय घेतला आहे, असे सावंत यांनी सांगितले. विद्यापीठाला पर्यायी जागा दिली जाणार आहे; त्यासाठी आम्ही प्रयत्नशील असू, असेही सावंत म्हणाले. विद्यापीठाच्या व्यवस्थापन परिषदेने घेतलेला निर्णय नक्कीच स्वागतार्ह असल्याचेही त्यांनी सांगितले. नागरिकांच्या सुविधेसाठी रुग्णालय उभारले जात असून यामध्ये कोणी राजकारण आणू नये, अशी टीकाही सावंत यांनी केली.

मेडिकल कॉलेज ओरोस येथे

सिंधुदुर्ग जिल्ह्यातील ओरोस येथील जिल्हा रुग्णालयाच्या परिसरातच प्रस्तावित शासकीय मेडिकल कॉलेज उभारण्यात येणार आहे. मुख्यमंत्री उद्धव ठाकरे यांनी सोमवारी ‘वर्षा’ येथे एका बैठकीत यासंदर्भात निर्देश दिले. बैठकीस वैद्यकीय शिक्षणमंत्री अमित देशमुख, पालकमंत्री उदय सामंत, आरोग्य राज्यमंत्री राजेंद्र पाटील यड्रावकर, माजी राज्यमंत्री दीपक केसरकर, खासदार विनायक राऊत, आमदार वैभव नाईक, मुख्य सचिव संजय कुमार, आरोग्य प्रधान सचिव डॉ. प्रदीप व्यास, वैद्यकीय शिक्षण सचिव सौरव विजय, जिल्हाधिकारी मंजुलक्ष्मी उपस्थित होते. मेडिकल कॉलेज आणि जिल्हा रुग्णालय एकाच परिसरात व जागेवर असेल तर सर्वांसाठी सोयीचे जाईल आणि सुविधांचा योग्य उपयोग करून घेता येईल, असे मुख्यमंत्री म्हणाले. या कॉलेजसाठी २५ किमी दूर झारापच्या पर्यायी जागेचा देखील विचार करण्यात आला होता.

Author: admin

Leave a Reply

Your email address will not be published. Required fields are marked *