कॉपीबहाद्दरांवर करडी नजर; महाविद्यालये सज्ज



म. टा. विशेष प्रतिनिधी

मुंबई : ऑनलाइन परीक्षा म्हणजे घरात समोर कोणाला तरी बसवून मोठ्याने प्रश्न वाचणे आणि त्याने ‘गुगल’ करून उत्तर सांगायचे इथपासून ते बाजूला दुसरे उपकरण ठेवून उत्तर शोधण्याचा प्रयत्न करणे…यांसारखे ‘उपाय’ शोधणाऱ्या विद्यार्थ्यांना यंदाच्या परीक्षेला फटका बसण्याची चिन्हे आहेत. कारण शहरातील कॉलेजांनी कॉपीबहाद्दरांच्या विरोधात कंबर कसली असून, अधिक सक्षम सॉफ्टवेअर वापरण्याचा निर्णय घेतला आहे.

मुंबई विद्यापीठाने ६ ते २१ मे या कालावधीत कॉलेजांना त्यांच्या स्तरावर पदवीच्या अंतिम वर्षाच्या परीक्षा घेण्याचे आदेश दिले आहेत. यानुसार कॉलेजांनी तयारी सुरू केली आहे. यंदा या परीक्षा ऑनलाइन असल्या तरी यामध्ये काही बदल करण्यात आले आहेत. यातील महत्त्वाचा बदल म्हणजे पारंपरिक अभ्यासक्रम वगळता व्यावसायिक अभ्यासक्रमांच्या विद्यार्थ्यांना बहुपर्यायी प्रश्नांसोबतच सविस्तर उत्तरे लिहिण्याबाबतचे प्रश्न विचारले जाणार आहेत. यामुळे गतवर्षीपेक्षा यंदाची ऑनलाइन परीक्षा अधिक अवघड असण्याची शक्यता आहे. याचबरोबर गतवर्षी झालेल्या कॉपीचे प्रमाण आणि वाढलेली निकालाची टक्केवारी लक्षात घेता यंदा शहरातील नामांकित कॉलेजांनी कॉपीबहाद्दरांना अटकाव करण्यासाठी यंत्रणा अधिक सक्षम करण्याचा विचार केला आहे.

परीक्षा ऑफलाइन होत असताना होणारे कॉपीचे प्रमाण आणि गतवर्षी ऑनलाइन झाल्यावर होणारे कॉपीचे प्रमाण यात दोन ते पाच टक्क्यांची वाढ झाल्याचे झेविअर्स कॉलेजचे प्राचार्य डॉ. राजेंद्र शिंदे यांनी सांगितले. यामुळे गतवर्षीपेक्षा अधिक सजगतेने यंदाच्या परीक्षेचे आयोजन करण्यात येणार आहे. याचबरोबर प्रॉक्टर्ड पद्धतीचा वापर करून विद्यार्थ्यांवर करडी नजर ठेवली जाणार असल्याचे एका प्राध्यापकाने सांगितले. तर ‘गुगल फॉर्म’च्या आधारे अनेकदा विद्यार्थी कॉपी करताना दिसतात. यामुळे यंदा कॉलेजकडून अंतर्गत सॉफ्टवेअर विकसित करण्याचा प्रयत्न सुरू असल्याचेही एका प्राध्यापकाने सांगितले. तर कॉलेजांमध्ये वॉर रूम तयार करण्यात येणार असून तेथून प्रत्येक विद्यार्थ्यावर करडी नरज असेल, असेही या प्राध्यापकाने सांगितले.

‘गुगल मीट’, ‘झूम’द्वारे देखरेख

‘गुगल फॉर्म’च्या आधारे होणाऱ्या या परीक्षेत प्रोक्टेड पद्धतीचा वापर करण्यात येणार आहे. याचबरोबर ‘गुगल मीट’ अथवा ‘झूम कॅमेरा’च्या माध्यमातून विद्यार्थ्यांवर लक्ष ठेवले जाणार आहे, असेही डॉ. शिंदे यांनी सांगितले. ज्या विभागांना प्राध्यापकांची संख्या कमी आहे अशा विभागांना इतर प्राध्यापकांचे सहकार्य दिले जाणार असल्याचेही ते म्हणाले. याचबरोबर यंदा काठीण्य पातळीही गेतवर्षीच्या तुलनेत अधिक असेल असेही ते म्हणाले.

परीक्षार्थींना निरनिराळे प्रश्न
प्रश्न क्रमांक सारखेच असल्यामुळे अनेकदा विद्यार्थी व्हॉट्सअॅप ग्रुपच्या माध्यमातूनही कॉपी करतात. यामुळे यंदा परीक्षेचे नियोजन करताना विशिष्ट सॉफ्टवेअरच्या मदतीने परीक्षार्थींसाठी निरनिराळे प्रश्न देण्यात येतील. यामुळे त्यांना कॉपी करणे अवघड जाणार असल्याचे दक्षिण मुंबईतील नामांकित कॉलेजच्या प्राध्यापकांनी सांगितले.

Author: admin

Leave a Reply

Your email address will not be published. Required fields are marked *